Кондак 1

Избраннаго раба Царя Небеснаго, добляго Христова страстотерпца, Иоанна святаго, воина и чудо­творца похвальными песньми воспоим, яко христиан заступника, целомудрия блюстителя, стражду­щих утéшителя. Ты же, предстояй Престолу Святыя Троицы, молитвами своими от всяких зол и на­пастей охраняй с верою и любовию зовущих ти: Радуйся, Иоанне свя­тый, воине и преславный чудотворче.

Икос 1

Архангели и Ангели с любовию зряху на равноангельское житиé твое, Иоанне пречудне, ты бо, пекийся о Господних, како угодити Гóсподеви, девство сохранил еси невреждéнно, постом и молитвою умерщвляя плоть свою день и нощь. Мы же таковому житию твоему дивящеся, со умилением взываем ти сице:
Радуйся, чистоту сердца своего сохранивый; радуйся, яко сего ради Бога узрéти сподобился еси.
Радуйся, иго Христово на рамо свое взéмший; радуйся, душу свою Христа ради погубивый, во еже спасти ю.
Радуйся, Ангелов сожителю; pадуйся, девственников похвалó.
Радуйся, хранителю и наставниче юных отроков; радуйся, скорый помощниче борющимся со страстьми и похотьми.
Радуйся, защитниче дев и вдо­виц; радуйся, обличение нарушите­лей целомудрия.
Радуйся, родителей и воспитате­лей наставниче; радуйся, сиротсвующих незримый водителю.
Радуйся, Иоанне святый, воине и преславный чудотворче.

Кондак 2

Видя святый Иоанн, егда прииде в Нумéры Ифальския, христианы гонимы, не убояся прещéний нечестиваго Иулиана и речé им: мужайтеся, укрепляйтеся в вере, да сподобитеся выну воспевати в небесных чертозех Христу Богу: Аллилуия.

Икос 2

Разум несумнéнный имел еси в себе, Иоанне достохвальне, егда славу мира сего презрев и гнева царскаго не устрашився, исповедал себе христианина быти, и сего pади, яко злодей, в темницу всаждéн был еси. Таковому твоему о Христе дерзновению дивящеся, глаголем: Радуйся, исповедниче Христов преизрядный; радуйся, Христу спострадавый.
Радуйся, идольскаго служенияпрелесть обличивый; радуйся, силою Креста врага победивый.
Радуйся, яко узы и темницу за Христа прияти сподобился еси; радуйся, яко хлад и наготу за Христа славе греховней предпочел еси.
Радуйся, исповедников похвалó; радуйся, мучеников радование.
Радуйся, в земных воинех доблий воин Царя Небеснаго; радуйся, убеливый ризы своя в Крови Агнчей.
Радуйся, Церкве Христовы защитниче; радуйся, всех православных заступниче.
Радуйся, Иоанне святый, воине и преславный чудотворче.

Кондак 3

Силою свыше препоясанный, возмогл еси победити древняго Змия; тоюжде силою одарéнный, источаеши обилие чудес всем призывающим с верою имя твоé и о тебе благодарно вопиющим Богу: Аллилуия.

Икос 3

Имея в сердце своем твердую веру во Христа и силою той вооружився, не убоялся еси гнева царéва и сохранил еси ифальския люди от мучителей. Сего ради таковое мужество твое похваляюще, бла­жим тя сице:
Радуйся, адаманте веры Христовы;  радуйся, стóлпе Церкве Божия.
Радуйся, верных надеждо и заступление; радуйся, неверных страх и посрамление.
Радуйся, венец исповедника Христова стяжавый; радуйся, оружием Креста врага Христова низложивый.
Радуйся, Христа паче мира возлюбивый; радуйся, за Христианы душу свою положивый.
Радуйся, замыслы богомерзкаго мучителя разсéявый; радуйся, яко в темницах сущих и во узах посещал еси.
Радуйся, яко и сам за Христа в темницу всажден был еси; радуйся, язвы Господа своего на теле носивый.
Радуйся, Иоанне святый, воине и преславный чудотворче.

Кондак 4

Бурею помышлений сумнитель­ных колебашеся блаженный Иоанн, егда послан бысть в Нумéры Ифальския, да мучит тамо верующия во Христа. Аще убо, — глаголаше,— по повелению царéву имам благо­верныя люди мучити и убивати, осуждéн буду от Бога, аще же не иду тамо, в чине воинства моего обрящуся царю противен и предан буду смерти лютей. Обаче страхом Божиим водимый, веру Христову в сердце своем сохранил еси даже до злостраданий и уз темничных, вопия Христу: Аллилуия.

Икос 4

Слышав нечестивый Иулиан твое ко христианам милосердие и увидев тя самаго христианина быти, разъярися на тя злобою и повелé привести в Царьград, яко злодея и противника царéва. Ты же, благодатию Божиею укрепляем, мужественно страдания претерпел еси и от веры во Христа никáкоже отступил еси. Сего ради величаем тя сице:
Радуйся, исповедниче веры во Христа неустрашимый; радуйся, воине Христов непобедимый.
Радуйся, яко со Архистратиги сил небесных Престолу Божию предстоиши; радуйся, скорый помощниче всем за истину терпящим.
Радуйся, искушений и соблазнов от диавола избéгнувый; радуйся, яко и всех призывающих тя от искушений избавляеши.
Радуйся, замыслы богомерзкаго мучителя разсеявый; радуйся, и нам сети диавола избегати помогáяй.
Радуйся, щитом веры себе само­го от стрел лукаваго защитивый; радуйся, имже и нас от искушений охраняяй.
Радуйся, рода христианскаго украшение; радуйся, чертогов не­бесных обитателю.
Радуйся, Иоанне святый, воине и преславный чудотворче.

Кондак 5

Боготечней звезде подобен был еси, Иоанне, егда, пришед в стра­ны Ифальския, увещал еси тамо сущих христиан не отступати от Солнца Правды Христа Бога, но выну пети Ему: Аллилуия.

Икос 5

Видя святый приводимыя пред него по повелению цареву верныяХристу люди на мучение за веру Христову, зело скорбé, в сердце своем пекийся да избавит их от руки мучителевы. Таковое твоé попечение о них похваляюще, зовем ти: Радуйся, любовь Христову в сердце своем имéвый; радуйся, яко тоюсогреваем от мучителей верныя рабы Христовы спасл еси.
Радуйся, веления нечестивых презревый; радуйся, заповеди Христовы сохранивый.
Радуйся, верных рабов Христовых друже; радуйся, христиан заступниче.
Радуйся, сущим в темницах и во узах утéшителю; радуйся, нищих кормителю.
Радуйся, странных водителю; радуйся, немощствующих врачу.
Радуйся, сирых заступниче; ра­дуйся, плачущих утéшителю.
Радуйся, Иоанне святый, воине и преславный чудотворче.

Кондак 6

Постом и молитвою плоть твою духови поработил еси и во славу Божию духовне пожил еси; сего ради ныне предстоиши Престол у Пресвятыя Троицы, выну воспевая песнь: Аллилуия.

Икос 6

Возсиял еси, яко новое светило на тверди небесней, всему роду христианскому, егда Божиим изволением обретено бысть нетленное тело твое, точащее обилие чудес с верою к заступлению твоему притекающим и молитвенно тебе взывающим:
Радуйся, Богу житием твоим угодивый; радуйся, сего ради от Него прославление приявый.
Радуйся, тщету и прелесть мира сего презревый; радуйся, мзду Небесную восприявый.
Радуйся, яко о мале верен явился еси; радуйся, яко обилие благодати Божией прияти сподобился еси.
Радуйся, яко в житии сем ближняго самоотверженно возлюбил еси; радуйся, яко в скорбех и напастех сущим заступник был еси.
Радуйся, душу свою за други полагáвый; радуйся, теплый ходатаю за нас у Царя Небеснаго.
Радуйся, от мучителева гнева христианы спасавый; радуйся, яко и днесь о спасении нашем печéшися.
Радуйся, Иоанне святый, воине и преславный чудотворче.

Кондак 7

Хотящу ти от мира сего преселитися, смиренномудрием побуждаем, повелел еси некоему че­ловеку тело твое положити в доме, идеже страннии и нищии погребахуся. Господь же, смиренныя возносяй, благоволи сохранити оное нетленно и чудотворения источающее всем к твоему заступлению с верою притекающим и о тебе Богу вопиющим: Аллилуия.

Икос 7

Новую покази милость рабом Своим Человеколюбец Господь, егда благоволи прославити тя и явити в тебе благодать Свою чудотворящу. Мы же таковому промышлению Божию радующеся,  благодарне вопиéм:
Радуйся, вместилище благодати Божией; радуйся, сосуде Божий избранный.
Радуйся, чудотворче предивный; радуйся, притекающим к тебе с верою скорую помощь подавáяй.
Радуйся, душевных и телесных недугов наших целителю; радуйся, бесов о имени Христове изгонителю.
Радуйся, лукавства врага человеческаго обличителю; радуйся, целомудрия охранителю.
Радуйся, благочестивых супружеств от всякаго диавольскаго прельщения незримая оградо; радуйся, и татьбы и грабительства скорый обличителю.
Радуйся, совратившихся на путь истины наставителю; радуйся, прошения наша на пользу исполняяй. Радуйся, Иоанне святый, воине и преславный чудотворче.

Кондак 8

Странное и дивное явление твое чрез сонное видéние некоей жене благоговейней увидевше и новаго чудотворца и угодника Божия в тебе познавше, людие константинопольстии умилишася и возопиша Богу: Аллилуия.

Икос 8

Весь добродетельми исполненный в жизни сей, по смерти же славою Божиею озарéнный, пре­клонявши ухо твоé на молитвы чту­щих тя, от них же слышиши сицевая:
Радуйся, милосердию Отца Небеснаго подражателю; радуйся, алчущих питателю.
Радуйся, странных невидимый сопутниче; радуйся, сирых покровителю.
Радуйся, озлобляемых утéшителю; радуйся, за истину терпящих подкрепителю.
Радуйся, недугующим ослабу и исцеление подавáяй; радуйся, в бе­дах сущих заступниче.
Радуйся, нищия возлюбивый; радуйся, яко с ними и по отшествии от мира сего телом разлучитися не восхотел еси.
Радуйся, яко в доме убогих по­гребсти тело свое завещал еси; радуйся, за смиренномудрие твое венцéм от Бога увенчанный.
Радуйся, Иоанне святый, воине и преславный чудотворче.

Кондак 9

Все воинство Ангельское возрадовашеся, видя тя, воина Царя Небеснаго непреоборима, победивша миродержителя тьмы и прелести века сего, темже и воспé Богу: Аллилуия.

Икос 9

Витии многовещанныя не возмогут по достоянию восхвалити страдания твоя, за Христа претерпéнныя, и милосердия и целомуд­рия твоего подвиги. Мы же таковым дивящеся, в немощи нашей милыя сия хваления приносим тебе:
Радуйся, Христа всем сердцем возлюбивый; радуйся, вольныя страдания за имя Его претерпевый.
Радуйся, о Бозе Вседержителе поревновавый; радуйся, венец мученический стяжавый.
Радуйся, правило веры и воздержания учителю; радуйся, ни­щету духовную проявивый.
Радуйся, смиренномудрием тво­им духа гордыни низложивый; радуйся, наследие Царства Небеснаго стяжавый.
Радуйся, в дому Отца Небеснаго обитель себе сотворивый; радуйся, яко о спасении нашем присно ходатайствуеши.
Радуйся, помощь скорую прося­щим подаваяй; радуйся, яко не­мóлчно молиши за ны Христа Бога.
Радуйся, Иоанне святый, воине и преславный чудотворче.

Кондак 10

Спасти хотя душу свою, презрел еси веления мучителя, и о теле своем нерадив, радостно восприял еси узы железныя и скорбь темничную, Иоанне, воине Христов, воспевая укреплявшему тя Богу: Аллилуия.

Икос 10

Стена еси и твéрдое прибежище всем с молитвою к тебе прибегающим, чудотворче Иоанне, сего ради зовем ти:
Радуйся, скорый послушниче всех призывающих тя; радуйся, яко честныя мощи твоя благоволи Бог прославити чудесы.
Радуйся, яко и от икон твоих подается благодать Божия взирающим на них с верою; радуйся, яко в созданных на прославлéние имене твоего храмах незримо обитаеши.
Радуйся, яко никтоже тамо с ве­рою молящийся тощ и неуслышан исходит; радуйся, яко молитвами твоими подкрепляеши наша моле­ния, ко Престолу Вседержителя восходящия.
Радуйся, яко коегóждо прошения предварити тщишися; радуйся, яко путем стрóпотным греха идущим вразумления подаéши.
Радуйся, яко искушаемым от диавола скорую помощь являеши; радуйся, яко всех на путь спасения направляеши.
Радуйся, яко грешныя на покая­ние наставляеши; радуйся, угодниче Христов и молитвенниче о нас благоприятный.
Радуйся, Иоанне святый, воине и преславный чудотворче.

Кондак 11

Пение похвальное приносим тебе, мучениче Христов Иоанне, еже с любовию приéмля, моли Господа избавитися нам от бед и скорбей, наипаче же в час кончины нашея твоим заступлением предвари, да не умрем без покаяния, но сподобимся в небесных селéниих с тобою воспети Богу: Аллилуия.

Икос  11

Свеща еси в церкви Христовой, горящи невещественным светом благодати Божией и озаряющи тьму неразумия нашего, Иоанне преблаженне. Сего ради молимтися: просвети ны, омраченныя грехом, да воспоим тебе:
Радуйся, свет Божественнаго учения в сéрдце своем носивый; радуйся, яко тем просвещаем тьму служения идольскаго обличил еси.
Радуйся, яко и нам тéмже све­том просветится тщишися; радуй­ся, яко славу Трисияннаго Божест­ва лицéм к лицу зриши.
Радуйся, лучи благодати Божией, от Солнца Правды возжéнная; ра­дуйся, озаряяй тьму невéдения на­шего светом заповедей Христовых.
Радуйся, звездо путеводная всем ищущим спасения; радуйся, яко наставляеши нас на всякое дело благое.
Радуйся, яко мысль благу нам на сердце во благоврéмении полагае­ши; радуйся, яко воинскому званию образ добраго воина в себе показуеши.
Радуйся, озаривый вселенную светом добродетелей твоих; радуйся, яко, видя добрыя дела твоя, человéцы Отца Небеснаго прославляют.
Радуйся, Иоанне святый, воине и преславный чудотворче.

Кондак 12

Благодать дана тебе от Бога во еже руководствовати ко спасéнию и от бед сохранити чтущих память твою; сего ради молитвами твоими огради от всякаго зла Церковь и страну нашу, верныя же вся в добродетелех преуспевати сотвори, да воспоим вси Богу: Аллилуия.

Икос 12

Поюще Бога, дивнаго во святых Своих, хвалим тя, исповéдника Христова, воина же и чудотворца хвалéньми сицевыми:
Радуйся, Церкви Божия украшение; радуйся, к воинству Небесному сопричтéнный.
Радуйся, всеоружие Божие приéмый; радуйся, тем вся козни вражия преодолéвый.
Радуйся, бронéю праведности облеченный; радуйся, щитом веры осенéнный.
Радуйся, шлем спасéния стяжавый; радуйся, меч духовный, еже есть слово Божие, паче всякаго оружия возлюбивый.
Радуйся, препоясанный от Бога правдою и истиною о чрéслех своих; радуйся, яко к званым на брачную Вечерю Агнца сопричтен еси.
Радуйся, яко тамо воспети песнь нову пред Престолом Его сподобился еси; радуйся, на Небе приобщаяйся ныне Христа истее, нéже иногда на земли.
Радуйся, Иоанне святый, воине и преславный чудотворче.

Кондак 13

О святый угодниче Христов и чудотворче Иоанне Воине! Приими; сие хваление наше и мольбы, тебе приносимыя, и благоприятными; твоими к Богу молитвами избави нас от всяких зол и обстояний, бо­лезней душéвных и телесных, и от мучения вéчнаго предстательством твоим сохрани достойны царствия небеснаго быти умоли, да спо­добимся в небесных селениих воспевати Богу: Аллилуия.
Этот кондак читается трижды, затем 1-й икос «Архангели и Ангели…» и 1-й кон­дак «Избраннаго раба…».

Молитва святому мученику Иоанну Воину

О преславный угодниче Хрис­тов Иоанне Воинственниче, храб­рый в ратех, врагов прогонителю и всем православным христианом великий заступниче! Помяни нас, грешных и недостойных раб, в бедах, скорбех и печалех, и во всяцей злей напасти сущих, и от всякаго злаго и обидящаго человека защити нас: дана бо тебе благодать от Бога молитися за нас, грешных, зле страждущих. Избави нас от обидящих нас, буди нам поборник крепок на вси враги наши, видимыя и невидимыя, да твоею помощию и крепким предстательством и поборством посрамятся вси являющии нам злая! О великий поборниче, Иоанне Воинственниче, не забуди нас, грешных, молящихся тебе и просящих твоея помощи и неоскудныя милости, и сподоби нас, грешных и недостойных раб, получити от Бога неизреченная благая, яже уготова Бог любящим Его, яко подобает Ему всякая слава, честь и поклонение, Отцу, и Сыну, и Святому Духу, ныне и присно и во веки веков. Аминь.

(2917)